ಮೊದಲ ಕ್ಷಣಗಳು...

              
              ನಂಬಬಹುದೇ ನಿನ್ನ ನಗುವನು ?
              ತಿಳಿಯಬಹುದೇ 
              ನನ್ನವಳೆಂದು ನಿನ್ನನು ?

              ಉಳಿಸಿಕೊಳ್ಳಬಹುದೇ ನಿನ್ನ ನೆನಪನ್ನು ?
              ಮರಳಿ ಮತ್ತೊಮ್ಮೆ 
              ಕೇಳಬಹುದೇ ನಿನ್ನ ದನಿಯನ್ನು ?

              ಇರಲಿ 
              ಒಪ್ಪಿಗೆಯೆಲ್ಲಿದೆ ?
              ಒಪ್ಪಂದವೆಲ್ಲಿದೆ ? ಹೃದಯದ ಭಾಷೆಗೆ !

              ಪುಸ್ತಕದ ಮೊದಲ ಸಾಲು 
              ಪರಿಚಯದ ಮೊದಲ ಕ್ಷಣಗಳು 
              ಎಂದಿಗೂ ಸವಿ ಸವಿ ಹನಿಗಳು 

ಭಜರಂಗಿ ಕೋಪ !

         ಆಯಿತು
       ಎಂದೋ ಸುಟ್ಟು ಬೂದಿಯಾಯಿತು
       ಲಂಕಾರೂಪ
       ಇನ್ನೂ ನೀಗಲಿಲ್ಲವೇ ನಿನ್ನ ಕೋಪ ?

       ಬಿದ್ದ
       ಎಂದೋ ಉರುಳಿ ಬಿದ್ದ
       ಹತ್ತು ತಲೆಯ ಹೊತ್ತ ರಾವಣ ಭೂಪ
       ಇನ್ನೂ ನೀಗಲಿಲ್ಲವೇ ನಿನ್ನ ಕೋಪ ?

       ನೆಚ್ಚಿಹರು
       ಬಹಳ ಮೆಚ್ಚಿಹರು ನಿನ್ನ ಕನ್ನಡಿಗರು
       ಎಲ್ಲೆಲ್ಲೂ ನಿನ್ನನ್ನೇ ಅಚ್ಚಿಹರು, ನೆನೆದಿಹರು

       ತಣ್ಣಗಾಗಲಿ ಇನ್ನಾದರೂ ನಿನ್ನ ಕೋಪ ಭಜರಂಗಿ !

ಧರ್ಮವಿದೇ ಧರಣಿಯಲ್ಲಿ !

ಧರ್ಮವಿದೇ

ಅನುತಿರಲು ಧರಣಿ 

ತಲ್ಲಣಗೊಂಡೆನು ನಾ ಹರಿಣಿ !

ಹುಸಿಯಲ್ಲ !

ಹಸಿದ ಹುಲಿಗೆ 

ಹಸಿ ಮಾಂಸದ ಬಯಕೆ 

ಕಾಡಿನರಸ ಕೇಸರಿಗೆ 

ಬಿಸಿ ನೆತ್ತರ ಬಯಕೆ 

ಏನು ನೀತಿಯಿದು ಧರಣಿ ?

ಕ್ರೂರ ಮೃಗಗಳ ಹಸಿವನು 

ನನ್ನ ಅಸುಗಳಲ್ಲಿ ತೀರಿಸಲೇಕೆ ?

ನಮ್ಮಂತೆ 

ಹಸಿರಲ್ಲಿ ಹಸಿವು ತೀರದು ಏಕೆ ?

ಏನು ನೀತಿಯಿದು ಧರಣಿ ?

ಕೊನೆ ಉಸಿರ ಎಳೆಯುವ ಮುನ್ನ 

ಏನು ನೀತಿಯಿದು 

ಒಮ್ಮೆ ಹೇಳಿಬಿಡು ಧರಣಿ ..... 

ಮಸಣದ ಬಂಧು !

ಮುರಿದ ಬಂಧ 

ಮುಗಿದ ಅನುಬಂಧ 

ಮನಸಿನಲಿ ಮಮತೆಯನು ಕಲಕಿದಾಗ 

ಕಂಬನಿ ಉಕ್ಕಿ ಹರಿದಾಗ 

ಮಸಣದಲ್ಲಿ 

ಕಣ್ಣೊರೆಸುವ ಬಂಧು ನೀನೊಬ್ಬನೆ 

ಮಸಣವೇ ನಿನ್ನ ಮನೆ !

ಯಾರು ? ಇನ್ನಾರು ?

ಬದುಕಿನಲಿ ಮತ್ತಾರು ?

ಬೇಸರದಲ್ಲಿ ಭರವಸೆಯನು ಹುಡುಕುವಾಗ  

ಬದುಕು ಸಾಕನಿಸುವಾಗ 

ಮಸಣದಲ್ಲಿ 

ಕಣ್ಣೊರೆಸುವ ಬಂಧು ನೀನೊಬ್ಬನೆ 

ಮಸಣವೇ ನಿನ್ನ ಮನೆ !

ವಿಷ ಸರ್ಪವಿದೆ ! ವಿಷ ಕಂಠವಿದೆ !

ಹಣೆಯಲಿ ಕಿಡಿ-ಕಾರುವ ಕಣ್ಣಿದೆ !!

ಆದರೇನು; ಸಂತೈಸುವ ಮನಸಿದೆ 

ಮಸಣದಲ್ಲಿ ಮನೆ ಮಾಡಿ 

ಕಣ್ಣೊರೆಸುವ ಬಂಧು 

ನಿನ್ನ ಬಿಟ್ಟು ಮತ್ತಾರು !  

ಉಳಿವುದೇ ಮನ !

ನೂರು ಮಾತೇಕೆ ?

ನಮ್ಮೂರ ಬೆಳದಿಂಗಳು 

ಕಿರುತಾರೆ ಕಂಗಳು 

ನೆನಪಾಗಿದೆ ನಿನ್ನ ನೋಡಿ ... 

ನಿಶ್ಶಬ್ದ ರಾತ್ರಿಯಲ್ಲಿ 

ಅತಿಶಯದ ಮಾತುಗಳು 

ಒಂಟಿತನದ ಕಲ್ಪನೆಯಲ್ಲಿ 

ಒಲಿಸುವಂತಾ ಮಾತುಗಳು 

ನೆನಪಾಗುತಿದೆ ಗೆಳತಿ ... 

ಸೆಳೆಯುತಿರೆ ಹೀಗೆ ಕಣ್ಣು 

ಉಳಿವುದೇ ಮನ ಇನ್ನು ...!! 

ಬಣ್ಣದ ಕನಸು!

ನಿದ್ದೆಯಲ್ಲಿ 

ಮೈ-ಮರೆತ ಕಣ್ಣಿಗೆ 

ಬಣ್ಣವನು ಹಚ್ಚಿಹೋದ ಈ ಕನಸು 

ಯಾವುದು ?

ಹಿಡಿಯಷ್ಟು ಆಸೆ 

ಕಡಲಷ್ಟು ಪ್ರೀತಿ !

ಕಲೆಸಿ ಬೆರೆಸಿ ಬಿಡಿಸಿದ 

ಬಣ್ಣದ ಚಿತ್ತಾರ ಈ ಕನಸು !

ನೀಲಿ ಗಗನದಲ್ಲಿ 

ನೆನಪಾಗಿ ನಿಂತು 

ಬಿಡದೆ ನಿರಂತರ ಹಿಂಬಾಲಿಸಿದ 

ಛಾಯೆ ಈ ಕನಸು !

ಯಾವುದು ಈ ಬಣ್ಣದ ಕನಸು ?