ಆ ಊರಿನಲ್ಲಿ ಹೇಗೆ ?

ಸಾಗರದ ಆಚೆಯಿಂದ 

ತೇಲಿ ಬಂದ ಹಕ್ಕಿ 

ಆ ಊರಿನಲ್ಲಿ ಹೇಗಿದೆ ?

ಮಿಟುಕುವುದೇ ?

ತುಂಬು ಕತ್ತಲಲ್ಲಿ ಚುಕ್ಕಿಯ ಕಣ್ಣು ... 

ಎಟುಕುವುದೇ ?

ಬೆಟ್ಟದ ಮೇಲಿಂದ ಆಗಸದ ಬೆನ್ನು ... 

ಆ ಊರಿನಲ್ಲಿ ಹೇಗೆ ?

ಕರಗುವುದೇ ?

ತಿಳಿ ಮುಂಜಾವಿನಲ್ಲಿ ಕನಸಿನ ಬಣ್ಣ ... 

ಕರೆಯುವುದೇ ?

ಹೂವಿನ ಕುಡಿ-ನೋಟ ದುಂಬಿಯನ್ನ ... 

ಆ ಊರಿನಲ್ಲಿ ಹೇಗೆ ?

ನಗಿಸುವನೇ ?

ತುಂಬುಗೆನ್ನೆಯ ಚಂದ್ರ ಮಕ್ಕಳನ್ನ ... 

ಉಣಿಸುವುದೇ ?

ಗೂಡಿನಲ್ಲಿ ಹಕ್ಕಿ ಗುಟುಕನ್ನ ... 

ಆ ಊರಿನಲ್ಲಿ ಹೇಗೆ ಹಕ್ಕಿ ?

ನಮಾಮಿ ಭಾಸ್ಕರ !

             ಕತ್ತಲ ಕೂಪದಲ್ಲಿ

           ನಿಘೂಡ ನೋವುಗಳು 

           ಮೂಡಣದಲ್ಲಿ 

           ಮನಸುಗಳಲ್ಲಿ 

           ಹೆಪ್ಪುಗಟ್ಟಿ ಹುತ್ತವಾಗಿ 

           ನಿನ್ನ ಉದಯವ ಕವಿಯುತಿದೆ 

           ಚಂಡ ರಶ್ಮಿಯ ಹರಿಸುತ 

           ಭಾಸ್ಕರ 

           ತಮಸ್ಸುಗಳ ತಳಹದಿಯ 

           ಥಳಿಸು ಬಾ 

           ಪಶ್ಚಿಮದಿಂದ ಪೂರ್ವಕ್ಕೆ 

           ನಡೆದು ಬಾ

ಢವ ಢವ ಡಮರುಕದಲ್ಲಿ...!

          ಉದಯರವಿ ಹರಿಸಿದ ಚೇತನ 
        ದಿಕ್ಕುಗಳ ಕಣ್ಣು ಮುಚ್ಚಿದ ಕತ್ತಲು 
        ಬತ್ತ ಆಸೆಗಳು; ಭರವಸೆಯ ಬಿಂದುಗಳು ... 
        ಏನೇನೋ ಇದೆ ಹೃದಯದ ಕೋಣೆಯಲ್ಲಿ 
        ಹಿಡಿಯಷ್ಟು ಜೀವದಲ್ಲಿ .... 

        ಹರಿವ ನದಿಗಳ ನಾದ 
        ಮುರಿದ ವೀಣೆಯ ವಿಷಾದ 
        ಹಳಸಿದ ಚಿಂತೆಗಳು; ಅರಳಿದ ಕನಸುಗಳು 
        ಏನೇನೋ ಇದೆ ಹೃದಯದ ಕೋಣೆಯಲ್ಲಿ
        ನೆತ್ತರ ಚಿಲುಮೆಯಲ್ಲಿ .... 

        ಕದಲಿ ಬದಲಾಗುವ ಋತುಗಳ ಹೊಸತನ 
        ದೀಪವನ್ನು ಮುತ್ತಿದ ಹುಳುಗಳ ಹುಚ್ಚುತನ 
        ಮುರಿದ ಕ್ಷಣಗಳು; ಮೆರೆದ ದಿನಗಳು 
        ಏನೇನೋ ಇದೆ ಹೃದಯದ ಕೋಣೆಯಲ್ಲಿ
        ಢವ ಢವ ಡಮರುಕದಲ್ಲಿ .... 

ಪತಂಗ ಯಾನ ...

ಎಲೆಯೆಲೆಗಳ ಮಡಿಲಲ್ಲಿ 

ಮಲೆ ಮಲ್ಲಿಗೆಯ ಕಿವಿಯಲ್ಲಿ 

ಏನನ್ನೋ ನುಡಿಯುತ್ತಿದೆ 

ಪಿಸುಮತಾಡುತಿದೆ ಮೆಲ್ಲಗೆ ... 

ಇಬ್ಬನಿ ಹನಿಗಳ, ಮುತ್ತಿನ ಹನಿಗಳ 

ಬೇಕೆಂದು ಕೇಳುತಿದೆಯೋ ... 

ಉಸಿರು ಉಸಿರಲಿ ಮೈಮರೆಯುತ 

ಗಂಧವನು ಸವಿಯುತಿದೆಯೋ ... 

ಬೆಟ್ಟದ ಬಯಲನು 

ಬಣ್ಣಿಸಿ ಹೇಳುತಿದೆಯೋ 

ಹುಟ್ಟದ ಹೂಗಳ 

ಹೆಸರನು ಕೇಳುತಿದೆಯೋ .... 

ಮೈಯ್ಯ ಬಣ್ಣಗಳ 

ಬಿಡಿಸಿ ತೋರುತಿದೆಯೋ 

ಕೆನ್ನೆಯ ಕೊನೆಯಲ್ಲಿ 

ಮುತ್ತನು ನೀಡುತಿದೆಯೋ ... 

ಮರಳಿ ಬರುವೆನೆನ್ನುತ 

ಹೂವಿಂದ ಹೂವಿಗೆ ಸಾಗುತಿದೆ 

ಪತಂಗ ಯಾನ ... 

ಬಣ್ಣದ ಕಾರಂಜಿ !

ಬಣ್ಣವಿದೆ, ಭಾವವಿದೆ 

ಜೀವಭಾವ ಹರಿಸುವ ಲಾಸ್ಯವಿದೆ 

ನಾದವಿದೆ, ವಿನೋದವಿದೆ 

ಮಿಡಿದು ಮೈಮರೆಸುವ ಮೋಹವಿದೆ 

ನಗುವಿದೆ, ನಾಟ್ಯವಿದೆ 

ನೂರೆಂಟು ಕನಸುಗಳ ಸ್ಪರ್ಶವಿದೆ 

ಸೆಳೆತವಿದೆ, ಸಂತಸವಿದೆ 

ಮನಸಿನಾಳಕೆ ಸೇರುವ ಸ್ಪೂರ್ತಿಯಿದೆ 

ಬಣ್ಣದಲಿ ಬೆರೆತ ಜೋಗವಿದೆ 

ವೈಣಿಕನಿಲ್ಲದೆ ನುಡಿವ ವೀಣೆಯಿದೆ 

ಚಿಮ್ಮುತ ನಲಿದಾಡಿದ ಕಾರಂಜಿಯಿದೆ 

ಬಣ್ಣದ ಕಾರಂಜಿಯಿದೆ ..... 

ಅಮ್ಮನ ವೇದನೆ !

          ಹೊತ್ತು ತಿರುಗಿದೆನೊ ನಿನ್ನ  
          ನನ್ನ ಹೊಟ್ಟೆಯಲಿ !
          ಮತ್ತೊಮ್ಮೆ ಹುಟ್ಟಿ-ಬಂದೆನೊ ಚಿನ್ನ 
          ನಿನಗೆ ಜೀವವ ಕೊಡುತಲಿ ... 

          ಇದಾವುದಕ್ಕೂ ನೀನು ಬೆಲೆ ಕಟ್ಟಬೇಕಿಲ್ಲ ... 
          ಲಾಲಿ ಹಾಡಿಗೂ, ಉಣಿಸಿದ ಹಾಲಿಗೂ ನೀನು ಬೆಲೆ ಕಟ್ಟಬೇಕಿಲ್ಲ ... 

          ಗಾಯದ ನೋವೋ; ಹಸಿವಿನ ಅರಿವೋ ಅದು 
          ಬಿಡಿಸಿ ಹೇಳಲಾಗದೆ ಅಳುತಲೇ ಇದ್ದೆ ನೀನು !
          ಕಂಡೆಲ್ಲಾ ದೇವರಲ್ಲಿ ಹರಸಿದೆ ಅಂದು 
          ಎಲ್ಲವನ್ನೂ ಮಡಿಲಲ್ಲೇ ಮರೆಸಿದೆ ನಾನು ... 

          ಇದಾವುದಕ್ಕೂ ನೀನು ಬೆಲೆ ಕಟ್ಟಬೇಕಿಲ್ಲ ... 
          ಅಕ್ಕರೆಯ ಮುತ್ತಿಗೂ; ಪ್ರೀತಿಯ ತುತ್ತಿಗೂ ನೀನು ಬೆಲೆ ಕಟ್ಟಬೇಕಿಲ್ಲ ...

          ಕೃಶಳಾಗಿ ಸೊರಗಿಹೆನು 
          ಶಕುತಿಯಾ ಕಳೆದು ಸೋತಿಹೆನು 
          ಹೊತ್ತಿಗೊಂದು ತುತ್ತನು ಕೇಳುತಿಹೆನು!
          ಇದಕ್ಕೆ ಬೆಲೆಯನು ಕೇಳಬೇಡವೋ ಕಂದ ... 

          ಇನ್ನೊಂದು ಜನುಮದಲಿ ಮತ್ತೊಮ್ಮೆ ಹೆತ್ತು ಋಣವ ತೀರಿಸುವೆನು 
          ನನ್ನೆದೆಯು ಒಡೆದು ಚೂರಾಗುವ ಮಾತದು !! 
          ಬೆಲೆಯನು ಕೇಳಬೇಡವೋ ಕಂದ ...

ಸುಂದರಕಾಂಡ

ಅಲ್ಲೊಂದು ಲಂಕಾಪುರಿ ಸಾಗರದಲ್ಲಿ 
ಅಸುರ ವೀರ ರಾವಣ ರಾಜನಲ್ಲಿ
ಕದ್ದ ಸೀತೆ ಅಶೋಕ ವನದಲ್ಲಿ... 

ಸೀತೆಯನು ಹುಡುಕುತ ಹೊರಟರು
ಹಲವು ದಿಕ್ಕಿನಲಿ ರಾಮ ಧೂತರು
ವೀರ ಹನುಮನ ಹಾಡಿ ಹೊಗಳಿದರು ...

ಸಾಗರ ದಾಟಿ ಲಂಕೆಯ ಸೇರಿದ
ಅಶೋಕ ವನದಲ್ಲಿ ಸೀತೆಯ ನೋಡಿದ
ಸೀತೆಯ ಕಂಬನಿ ನೋಡಿ ಕಡು ನೊಂದ ...

ರಾಮನ ಉಂಗುರ ಸೀತೆಯ ಕೈಗೆ
ಸೀತೆಯ ಒಡವೆ ರಾಮನ ಕೈಗೆ
ಸೇರಿಸಿ; ಹಬ್ಬವ ತಂದ ಅವರಿಬ್ಬರ ಮನಸಿಗೆ ...

ಸೀತೆಯಿಂದ ಮೆಚ್ಚುಗೆಯ ಪಡೆದುಕೊಂಡ
ಅತಿಯಾಗಿ ನಲಿದ ರಾಮನು ಅಪ್ಪಿಕೊಂಡ
ಅದಕೇ ಇದು ಸುಂದರಕಾಂಡ ... 

ನೀನ್ಯಾರೆ ..?

ನಗುತ 
ನನ್ನೆದೆಯ ಚಿವುಟಿ ಹೋದ 
ನಿನ್ನ ಮಿನುಗು ನೋಟ 
ಕರಗದೆ ನಿನ್ನೋರೆಗಣ್ಣಲಿ ಒರಗಿ ನಿಂತಿದೆ 


ನಾಚುತ 
ಕೆಂದುಟಿಯ ಮೇಲೆ ಅರಳಿ ನಿಂತ 
ನಿನ್ನ ನಗುವು 
ಮೆಲ್ಲಗೆ ನನ್ನೆದೆಯ ಗೂಡಲಿ ಘಲ್ಲೆನಿಸಿದೆ 


ನೀನ್ಯಾರೆ?
ತಿಳಿ ನೀರಿನಲ್ಲಿ ನಸು-ನಗುವ 
ಕೆಂದಾವರೆಯೋ ..?
ಬೆಳ್ಳಿ ಚಂದ್ರಂಗೆ ಕಾದು ನೋಡುವ 
ಒಂಟಿ ತಾರೆಯೋ ...?
ನೀನ್ಯಾರೆ ..?

ಮೂಡಣದಲ್ಲಿ ಮನವಿ ...

ಸತ್ಯಾಂಶ ಸುಳಿವ ಜಗದಲ್ಲಿ 

ಮಂಕು ಕವಿಸುವ 

     ತಮಸ್ಸು ಮೂಡುತಿದೆ ಇರುಳಲ್ಲಿ ... 

ಮೂಡಣವ ಅಗಲಿ, 

        ಪಡುವಣಕೆ ನೀ ಸೇರದಿರು ರವಿಯೆ .... 

ಹೂ-ಗರ್ಭದಿಂದ ಹರಿವ ನಗುವು 

ನೀ ಇಲ್ಲದ ಬದುಕು ಬೇಡವಾಗಿ, 

    ಬಾಡುತಿದೆ ಹೂಗಳ ನವಿರು ತುಟಿಗಳ ಮೇಲೆ ... 

ನಿತ್ಯ-ಚೇತನವ ಚದುರಿಸಿ, 

ನೀ ಮುಳುಗದಿರು ರವಿಯೆ... 

ಕೆರಳಿದ ಕಡಲಿನ ಅಲೆಗಳ ಮೇಲೆ 

ದಾರಿಯನು ಹುಡುಕುತ ಹಡಗು, 

ನೀ ಇಲ್ಲದೆ ಕತ್ತಲಲ್ಲಿ ಕಂಗಾಲಾಗಿದೆ...  

ಬೆಳಕಿಂದ ಭುವಿಯನು ತಣಿಸುತ 

ನೀ ಬೆಳಗುತಿರು ರವಿಯೆ ....