ಕೆಟ್ಟ ಕನಸಿಗೊಂದು ಕಿವಿಮಾತು

ಮೆಚ್ಚು ಕ್ಷಣಗಳ
ನೆನಪುಗಳ ಅಂಗಳದಲ್ಲಿ...
ಹುಚ್ಚು ಬಯಕೆಗಳ
ಹೃದಯದ ಆಳದಲ್ಲಿ...

ಸುಳಿಯಬೇಡ ನೀನು!

ರಂಗು ಏಳರ
ಮಳೆ-ಬಿಲ್ಲಿನಲ್ಲಿ ...
ಚಿಟ್ಟೆಯೊಂದರ
ಆಟ ಮೈಮಾಟದಲ್ಲಿ...

ಕರಗಿಹೋಗು ನೀನು!

ನೆಮ್ಮದಿಯಿಂದ ನಿದಿರೆ-ಮಾಡಬೇಕು ನಾನು...

ಆತ್ಮಹತ್ಯೆ!

ನೊಂದಿರುವೆ ನೀನು
ಕಹಿಯಲೆ ಬೆಂದಿರುವೆ ನೀನು
ಕ್ಷಣಕಾಲ ಪಡೆ ನೀ ತಾಳ್ಮೆಯನು
ಮನವೆ ದುಡುಕಬೇಡ ನೀನು ....!


ಕಣ್ಣೀರಲೆ ಹರಿಸಿಬಿಡು ನಿನ್ನ ನೋವನು
ನಿನ್ನವರಲಿ ಹಂಚಿಕೊ ವ್ಯಥೆಯನು
ಮೌನವಾಗಿ ಕಳೆದುಬಿಡು ಸಮಯವನು
ಮನವೆ ದುಡುಕಬೇಡ ನೀನು ....!


ಬಾನಿನ ರವಿಯು ಬಾಡನು
ನಿನಗಾಗಿಯೆ ಒಮ್ಮೆ ಮೂಡುವನು
ಛಲದಿಂದ ಅಪ್ಪಿಕೊ ಕ್ಷಣವನು
ಮನವೆ ದುಡುಕಬೇಡ ನೀನು ....!


ಬದುಕೊಂದು ವರ ಭೂಮಿಯ ಮೇಲೆ ...

ಬಿರಿದ ಭಾವ

ಮುಸುಕಿದ ಮಂಜಿನಲಿ,
ಮುಂಜಾನೆ ಮಡಿಲಲ್ಲಿ,
ಮುತ್ತಿನಂತೆ ಹೊಳೆಯುವ ಆಸೆ ...!


ಮುಸ್ಸಂಜೆ ತಂಪಿನಲಿ,
ಮೋಡಗಳ ದಾಟುತಲಿ,
ಮುಗಿಲಲ್ಲಿ ಮಿನುಗವ ಆಸೆ...!


ಮೊಗ್ಗುಗಳ ಕಂಪಿನಲಿ,
ಮುರಳಿಗಳ ಇಂಪಿನಲಿ,
ಮನಸುಗಳ ತೊಯಿಸುವ ಆಸೆ...!


ನಾನೊಬ್ಬ ಭಾವ ಜೀವಿ....

ಮಮಕಾರ ಮಾಯೆ...!

ಬಿಟ್ಟು ಉಳಿದರೆ, ಬೇಯುತಿದೆ ಮನಸು!
ಅಗಲಿ ನಡೆದರೆ, ಬೇಕೆನ್ನುತಿದೆ ಮನಸು!

ಕರುಳು ಹಂಚಿದ ಫಲವೊ...
ನೆತ್ತರಲಿ ಹರಿದ ಬಂಧವೊ...
ಮನಸನು ತಡೆಯುವ ಬಲವೊ ಇದು...

ತವರಿನಲಿ ತಾಯಿಯನು ಅಗಲಿ...
ಪತಿಯ ಪುರಕೆ ಕದಲಿ...
ನಾ ಹೋಗೆನೆಂದಳು ಮದುಮಗಳು ಓರೆಗಣ್ಣಲಿ...!

ಒಪ್ಪದ ಹೆಜ್ಜೆಯನು ತಡೆಯಿತು ಕಣ್ಣೀರು...
ಕೈಬಳೆ, ಕಾಲ್ಗೆಜ್ಜೆ ಸುಮ್ಮನಾದವು ಕಣ್ಣೀರೆದುರು...
ಹೆತ್ತ ಕರುಳನು ಸಂತೈಸಿದವರೆ ಎಲ್ಲರೂ...

ಇದು ಮಮಕಾರ ಮಾಯೆ...!

300

ಸಿಡಿಲೆದೆಯ ಬಡಿತ,
ಗುಡುಗಿನಂತೆ ಗರ್ಜಿಸುತ...

ಹೆಬ್ಬುಲಿಯಂತೆ ಹುಬ್ಬೇರಿಸುತ,
ಕೆರಳಿ ಕಣ್ಣನು ಕೆಂಪಾಗಿಸುತ...

ನರನಾಡಿಯಲಿ ಪೌರುಷವನು ಎಬ್ಬಿಸುತ ,
ಎದುರಾಳಿಯ ಎದೆಯನು ಸೀಳುತ ...

ಕೋಪದಿಂದ ಕಿಡಿ ಕಾರುತ,
ಕೆರಳಿದ ಕೇಸರಿಯಂತೆ ಬೇಟೆಯಾಡುತ,

ಸಾವನ್ನೇ ಅಪ್ಪಿಕೊಳ್ಳುತ,
ಯುದ್ಧ ಭೂಮಿಯನೇ ಅಂಜಿಸುತ...!!!

ಒಬ್ಬರಿಗೆ ಮತ್ತೊಬ್ಬರು ಜೊತೆಯಾಗಿ ಕೂಗಿದರು,
ಮೂರು ನೂರು ಕ್ರಾಂತಿ ವೀರರು ...

ಶರತ್ಕಾಲ

ಹಸಿರಾದ ಎಲೆಗೆ
ಹೊಸ ಚಿಗುರಿನ ಬಯಕೆಯಾಗಿ

ಹಾಡು ಮರೆತ ಕೋಗಿಲೆಗೆ
ಹೊಸ ಹಾಡಿನ ನೆನಪಾಗಿ

ಹಸಿರೆಲ್ಲವೂ ಹಳದಿಯಾಗಿ
ಎಲೆಗಳೆಲ್ಲಾ ಒಂದೊಂದಾಗಿ

ಉದುರಿಹೋಗುತಿರಲು
ಒಂದಾಗಿ ನಗುತಿರಲು

ಸವಿಯಾಯಿತು ಕ್ಷಣ
ಕವಿಯಾಯಿತು ನನ್ನ ಮನ...

ಸೃಷ್ಠಿ...!

ಅರಿವನು ಜೊತೆಯಾಗಿ
ಮರೆವನು ವರವಾಗಿ
ನಿನ್ನ ಈ ಸುಂದರ ಸೃಷ್ಠಿಯಲಿ
ಪುಟ್ಟ ಹೃದಯದಲಿ


ಜೀವ ತುಂಬಿದ ನಿನ್ನ ಕಲೆಗೆ


ಸಹಿಸಲಾರದ ನೋವು ಕಪ್ಪು ಕಲೆಯಾಗಿದೆ
ಹಲವು ಮನಸುಗಳು ಮರೆಯದಾಗಿದೆ
ಕಣ್ಣಂಚಿನಿಂದ ಕಣ್ಣೀರು ಕವಲೊಡೆದು ಹರಿಯುತಿದೆ
ನಿನಗೆ ತಿಳಿಯದೆ?

ಚಲಿಸುವ ಮೋಡಗಳು

ನೀಲಿ ಬಾನಿನಲಿ ನಡೆದು ಹೋಗುವ ಮೋಡಗಳೆ
ತಂಗಾಳಿಯಲಿ ತೇಲಿ ಹೋಗುವ ಮೋಡಗಳೆ
ನಿಮ್ಮ ಪಯಣದಲಿ ನಿಮ್ಮ ಜೊತೆಯಿರುವವರಾರು?

ನಡು ರಾತ್ರಿಯ ನಿಶ್ಶಬ್ದ ನಾಡಿನಲಿ
ತಾರೆಗಳ ಅಂಗಳದಂತಿರುವ ಬಾನಿನಲಿ
ನಿಮ್ಮೊಂದಿಗೆ ಪಿಸುಮಾತಾಡುವ ಗೆಳೆಯರಾರು?

ಚಂದಿರನ ಸನಿಹದಲಿ ಸುಳಿದರೂ
ಕವಿಗಳ ಮನ ಸೆಳೆದರೂ
ನನ್ನ ಹೊರತು ನಿಮ್ಮನು ಬಣ್ಣಿಸಿದವರಾರು?

ಹೂಗುಚ್ಚ

ಗಾಢವಾದ ಮೌನ ನೋಟದಲಿ,

ನಿಮ್ಮ ಮಡಿಲಲ್ಲೇ ಮೈ-ಮರೆತ ಬಣ್ಣದಲಿ,

ಕುಡಿಗಳ ಕೊನೆಯಲಿ,

ನಗುತ ನಿಂತ ನೀರ ಹನಿಯಲಿ,

ಮೈ-ಮನವೆಲ್ಲಾ ತುಂಬಿಹೋದ ಕಂಪಿನಲಿ,

ಮನಸಿಗೆ ಕೇಳುವಂತೆ,

ನೀವು ನುಡಿದ ಭಾಷೆ ಯಾವುದು?