ಸ್ವೇಚ್ಛೆಗೊಂದು ಪಂಜರ !!

ಕಚ್ಚಿ ನೋಡಿ ಹಸಿ ಹಣ್ಣುಗಳ 
ಮೆಚ್ಚಿ ಮತ್ತೊಂದು ತಿಂದ 
ಆ ದಿನಗಳು ಇನ್ನಿಲ್ಲ ...!

ಬಿಚ್ಚಿ ರೆಕ್ಕೆಗಳ ಬಾನಗಲ 
ಹುಚ್ಚು ಅನಿಸುವಂತೆ ಹಾರಾಡಿದ 
ಆ ದಿನಗಳು ಇನ್ನಿಲ್ಲ ...!

ಜೋಡಿಯಾಗಿ ಜೊತೆ-ಜೊತೆಯಲಿ 
ಜಗವನ್ನೇ ಸುತ್ತಿಬಂದ 
ಆ ದಿನಗಳು ಇನ್ನಿಲ್ಲ ...!

ಜೀಕುತ ತೀರದ ತಪ್ಪಲಲ್ಲಿ 
ಜಡಿ-ಮಳೆಯಲಿ ನೆಂದ 
ಆ ದಿನಗಳು ಇನ್ನಿಲ್ಲ ...!

ಬಾಗಿಲೇ ಇಲ್ಲದ ನನ್ನ ಮನೆಗೆ 
ಕಬ್ಬಿಣದ ಕಂಬಿಗಳ ಕಾವಲು .... 
ಬಯಲಲ್ಲೇ ಕಳೆದ ನನ್ನ ಬದುಕಿಗೆ 
ಬದುಕಿ ಉಳಿಯುವ ಸವಾಲು ...

ನನ್ನ ಸ್ವೇಚ್ಛೆಗಿದು ಪಂಜರ .... 

 

ಅರುಣೋದಯ...

ಅರುಣನ ಉದಯವು 

ಕೆಂದಾವರೆ ಅರಳುವ ಸಮಯವು 

ಚಿಲಿಪಿಲಿ ಕೇಳಿದರೆ ಮಧುರವು 

ಮಂಜಿನ ಸೋನೆ 

ಮುಂಜಾನೆಯಲಿ ಸುರಿವಾಗ ತಣ್ಣನೆ 

ಕರಗಿತು ಮನಸಿನಲಿ ಬೇನೆ!  

ಹೊಸಬೆಳಕಿನ ಕಿರಣ 

ಹೊಂಗನಸಿನ ಮನನ 

                                   ಜೊತೆ ಸೇರಿದ ಪ್ರತೀದಿನ ನವ ನವೀನ ... 

 

ಮಧುಸ್ನಾನ ಮಹಾಶಿವಂಗೆ!

                 
                  ಬುಸುಗುಡುತ 
                  ಹೆಗಲಮೇಲೆ ಹೆಡೆಯನೆತ್ತಿದ ವಿಷನಾಗ!
                  ವಿಷವ ಕಾರುತ 
                  ಉಸಿರಾಡಲು, ಬೆನ್ನು ಬಿಸಿಯಾಯಿತೇನೊ ಆಗ 

                  ತಣ್ಣಗಾಗಲಿ ಮಧುಸ್ನಾನದಲಿ ಮಹಾಶಿವಂಗೆ ... 

                  ಅಂಗೈಲಿ ಹಿಡಿಯುತ 
                  ವಿಷವನೆಲ್ಲಾ ಕುಡಿದ ಕಡಲನು ಕಡಿದಾಗ 
                  ಗಂಟಲನು ಸೇರುತ 
                  ಕೊರಳು ನೀಲವಾಗುತಿರಲು ಕಹಿಯಾಯಿತೇನೊ ಆಗ 

                  ಸಿಹಿಯಾಗಲಿ ಮಧುಸ್ನಾನದಲಿ ಮಹಾಶಿವಂಗೆ ...

                  ತಪಸನು ಮಾಡುತ 
                  ಕಣ್ಣಲ್ಲೇ ಕಿಡಿಕಾರಿ ಮನುಮಥನ ಸುಟ್ಟಾಗ 
                  ಬೆಂಕಿಯು ಚಿಮ್ಮುತ 
                  ಉರಿಯುತಿರಲು, ಹಣೆಯೆಲ್ಲವೂ ತುಸು ಬಿಸಿಯಾಯಿತೇನೊ ಆಗ 

                  ತಂಪಾಗಲಿ ಮಧುಸ್ನಾನದಲಿ ಮಹಾಶಿವಂಗೆ ...

                  ಮೂರು ಲೋಕವನು ಕಾಯುವ ತಂದೆಗೆ ... 
                           
 

ಗ್ರಹಬಲ!

          ಮೂಡಲ ಮನೆಯ ಒಡೆಯ 
        ರಥವೇರಿ ಬಂದಾಗ 
        ರಜನಿಯು ಕಾಣದೆ ಕಣ್ಮರೆಯಾದಾಗ 
        ಹರಿದ ಬೆಳಕು, ಯಾರಿಗೂ ಕೆಡಕಲ್ಲವೊ ಗೆಳೆಯ 
        ಪ್ರತಿ ದಿನವೂ ಶುಭ ದಿನವೇ... ನೀ ತಿಳಿಯ .... !! 

    
        ಗ್ರಹಗಳ ಗತಿಯನು, ಸಮಯದ ಸ್ಥಿತಿಯನು ಮರೆಯ 
        ಬೆವರುವಂತೆ ದಣಿದಾಗ 
        ಮೋಸವನು ಮರೆತು ನಡೆದಾಗ!! 
        ಹುಡುಕಿ ಬರುವುದೊ ನಿನ್ನ ಫಲವು ತಿಳಿಯ 
        "ಸಕಲ ಗ್ರಹಬಲ ನೀನೇ ಸರಸಿಜಾಕ್ಷ... " ಎಂದು ಮುನ್ನೆಡೆಯ ... 
                                                                                                 . 

ಆಸೆಯಲ್ಲಿ ಯಾನ..!

ಎದೆಯೊಳಗಿನ ಜೀವ ಭಾವ 
ನಿಜವಾಗಲೆಂಬ ಅತೀವ ಆಸೆ ...!
ಕಣ್ಣಾಲಿಯಲಿ ಕನಸಿನ ಹಾವ-ಭಾವ 
ನನಸಾಗಲೆಂಬ ಮಹದಾಸೆ ...!

ಸೇರಬಂತು ಈ ಸಂಜೆಯಲ್ಲಿ 
ತನುವು ತೇಲಿತು ತಾರಾ ತೀರದಲ್ಲಿ .... 


ಕಲ್ಲು-ಸಕ್ಕರೆಗೆ ಕೊಂಚ ಅಕ್ಕರೆ ಬೆರೆಸಿದಂತೆ,
ಮೆಲ್ಲು-ದನಿಯೊಂದು ಮನಸನ್ನು ಮುಟ್ಟುತಿದೆ 
ತಂಗಾಳಿಗೆ ತೋರಣವು ಕದಲುವಂತೆ,
ಮಿಡಿತವೊಂದು ಮನಸನ್ನು ಮೀಟುತಿದೆ... 

ಹಾಗೇ ಸುಳಿಯುತಿದೆ ಸುತ್ತಲ ಮೌನ,
ನಿಲ್ಲದೆ ಸಾಗುತಿದೆ ಆಸೆಯಲ್ಲಿ ಯಾನ...  

ಮರಳಿಬಾರದೇಕೊ.....!!

                          ಮುಸ್ಸಂಜೆ ಮಳೆಯಲ್ಲಿ
                     ಉಕ್ಕಿ ಹರಿದ ಹೊಳೆಯಲ್ಲಿ 
                     ತೇಲಿಬಿಟ್ಟ ಹಡಗು.........  ನೆಂದು ಉರುಳಿದ ನೆನಪು ...

                     ತುಂಬು ಕೆರೆಯ ಪಕ್ಕದಲ್ಲಿ
                     ಮುದ್ದು ಮಾತನು ಕೇಳುತಲಿ 
                     ಕೈಬೆರಳು ಹಿಡಿದು .......... ನಡೆದು ಹೋದ ನೆನಪು ....

                     ಬೆಟ್ಟದಡಿಯ ಬಯಲಲ್ಲಿ
                     ಬಣ್ಣ ಬಣ್ಣದ ಬಗೆಯಲ್ಲಿ
                     ಮುಗಿಲ ಮನೆಯತ್ತ ......... ಪಟವನು ಹಾರಿಸಿದ ನೆನಪು ....

                     ಅದಾವುದೋ ಕಥೆಯಲ್ಲಿ
                     ಅದಾರೊ ಸೋತ ಖುಷಿಯಲ್ಲಿ
                     ಮನಸಾರೆ ಜೊತೆ ಜೊತೆಯಾಗಿ ....... ಚಪ್ಪಾಳೆ ತಟ್ಟಿದ ನೆನಪು ....

                     ಅದೇ ನೆನಪು ...
                     ಮುಚ್ಚು ಮರೆಯಿಲ್ಲದೆ ನಕ್ಕು ನೆಗೆದ ನೆನಪು ...
                     ಹಗುರ ಮನಸಿನ ತುಂಬಾ ಅದೇ ನೆನಪು !!

                     ಮರಳಿಬಾರದೇಕೊ ಆ ಕ್ಷಣಗಳು ...!

ನಿಲ್ಲದ ಹಲ್ಲೆ !!

                            ಜೀವಜಾಲದ ಆಳಕೆ ಸೇರಿ 
                            ಮೊದಲ ಮಾತಿನಲಿ ಬೆರೆತ ಮಧುರ ಕಾವ್ಯ - "ಅಮ್ಮ" !

                            ಒಡಗೂಡಿ ನಡೆದ ಪ್ರತೀ ದಿನದಲಿ 
                            ಅಕ್ಕರೆಯಲಿ ಅಮ್ಮನಿಗೆ ಸಾಟಿ ಇವಳು - "ಸೋದರಿ" !

                            ರಂಗು ರಂಗಿನ ಹುಚ್ಚು ಕನಸಿನಲಿ 
                            ಅರಿವಾಗದೆ ಬಿರಿದ ನೂತನ ಕವನ - "ಗೆಳತಿ" !

                            ಒಂದಾಗಿ ನಡೆದ ಏಳು ಹೆಜ್ಜೆಯಲಿ 
                            ಜೊತೆಯಾಗಿ ಮಿಡಿದ ಜೀವನರಾಗ - "ಒಡತಿ" !

                            ಬದುಕೆಲ್ಲವೂ ಹೆಣ್ಣೇ!!

                           ಅವಳಿಲ್ಲದ ಜೀವನ ಸುಳ್ಳೇ !! 
                           ಅರಿವಾಗಿ ನಿಲ್ಲಬೇಕು ಹಲ್ಲೆ !

ಪ್ರೇಮಿಗಳ ಮಾತು ..!!

                                                ಮಳೆಯಲಿ,
                                      ಮೊದಲ ಹನಿ  !
                                      ಮುಂಜಾನೆಯಲಿ,
                                      ಕರಗದ ಇಬ್ಬನಿ !
                                      ನಿನಗಾಗಿ ತರುವೆ ....

                                      ಚಳಿಯಲಿ,
                                      ಬೆಚ್ಚನೆಯ ಕಿವಿಮಾತು !
                                      ಇರುಳಲಿ,
                                      ಕನಸಿಗಾಗಿ ಸವಿಮಾತು !
                                      ನಿನಗಾಗಿ ಹೇಳುವೆ ....

                                      ಹಿತ ಭಾಷೆಯಲಿ,
                                      ಓಲೆಯನು !
                                      ನಿನ್ನ ಹೋಲಿಸುತಲಿ,
                                      ಕವಿತೆಯನು !
                                      ನಿನಗಾಗಿ ಬರೆಯುವೆ ....

                                      ಬದುಕಿನಲಿ,
                                      ಅನುದಿನ ಸುಖವನು !
                                      ಅನುದಿನದಲಿ,
                                      ಪ್ರತಿ-ಕ್ಷಣ ನಲಿವನು !
                                      ನಿನಗಾಗಿ ಕೋರುವೆ ....

                                      ನನ್ನ ಜೊತೆಯಾಗು ಬಾ ಗೆಳತಿ .....!