ಹೊತ್ತು ತಿರುಗಿದೆನೊ ನಿನ್ನ
ನನ್ನ ಹೊಟ್ಟೆಯಲಿ !
ಮತ್ತೊಮ್ಮೆ ಹುಟ್ಟಿ-ಬಂದೆನೊ ಚಿನ್ನ
ನಿನಗೆ ಜೀವವ ಕೊಡುತಲಿ ...
ಇದಾವುದಕ್ಕೂ ನೀನು ಬೆಲೆ ಕಟ್ಟಬೇಕಿಲ್ಲ ...
ಲಾಲಿ ಹಾಡಿಗೂ, ಉಣಿಸಿದ ಹಾಲಿಗೂ ನೀನು ಬೆಲೆ ಕಟ್ಟಬೇಕಿಲ್ಲ ...
ಗಾಯದ ನೋವೋ; ಹಸಿವಿನ ಅರಿವೋ ಅದು
ಬಿಡಿಸಿ ಹೇಳಲಾಗದೆ ಅಳುತಲೇ ಇದ್ದೆ ನೀನು !
ಕಂಡೆಲ್ಲಾ ದೇವರಲ್ಲಿ ಹರಸಿದೆ ಅಂದು
ಎಲ್ಲವನ್ನೂ ಮಡಿಲಲ್ಲೇ ಮರೆಸಿದೆ ನಾನು ...
ಇದಾವುದಕ್ಕೂ ನೀನು ಬೆಲೆ ಕಟ್ಟಬೇಕಿಲ್ಲ ...
ಅಕ್ಕರೆಯ ಮುತ್ತಿಗೂ; ಪ್ರೀತಿಯ ತುತ್ತಿಗೂ ನೀನು ಬೆಲೆ ಕಟ್ಟಬೇಕಿಲ್ಲ ...
ಕೃಶಳಾಗಿ ಸೊರಗಿಹೆನು
ಶಕುತಿಯಾ ಕಳೆದು ಸೋತಿಹೆನು
ಹೊತ್ತಿಗೊಂದು ತುತ್ತನು ಕೇಳುತಿಹೆನು!
ಇದಕ್ಕೆ ಬೆಲೆಯನು ಕೇಳಬೇಡವೋ ಕಂದ ...
ಇನ್ನೊಂದು ಜನುಮದಲಿ ಮತ್ತೊಮ್ಮೆ ಹೆತ್ತು ಋಣವ ತೀರಿಸುವೆನು
ನನ್ನೆದೆಯು ಒಡೆದು ಚೂರಾಗುವ ಮಾತದು !!
ಬೆಲೆಯನು ಕೇಳಬೇಡವೋ ಕಂದ ...
No comments:
Post a Comment